ඒෂියා මිරකල් (2025) සම්මාන උළෙලේදී වසරේ හොඳම ශිෂ්‍යත්ව විභාග දේශකවරිය හා වසරේ ජනප්‍රියතම ගුරුවරයා සම්මානය හයේෂිකා ප්‍රනාන්දු මහත්මිය හිමි කර ගත් අතර එම සම්මානය ඇයට පිරිනැමීම කම්කරු නියෝජ්‍ය අමාත්‍ය මහින්ද ජයසිංහ මහතා ප්‍රතික්ෂේප කර තිබුණා.
අමාත්‍ය මහින්ද ජයසිංහ මහතා වේදිකාවේ සිටියදී ඇයට එම සම්මානය පිරිනැමීම සිදුකරමින් තිබුණ අතර සම්මානය ලබාදීම අමාත්‍යවරයා විසින් ප්‍රතික්ෂේප කිරීමෙන් ඔහු වෙනුවට ඒ ආසන්නයේ සිටි වෙනත් කෙනෙකු සම්මානය පිරිනමනු ලැබුවා.
ඒ පිළිබඳව ඊයේ (27) පැවති මාධ්‍ය හමුවකදී අමාත්‍යවරයා කියා සිටියේ, ලංකාවේ ගුරුවරුන් අතරින් හොඳම ගුරුවරිය හයේෂිකා ප්‍රනාන්දු නොවන හෙයින් ඒෂිය මිරකල් සම්මාන උළෙලේදී තමන්ගේ හෘදය සාක්ෂියට එකඟව ඇයට එම සම්මානය ලබාදීමට නොහැකි නිසා එය ප්‍රතික්ෂේප කළ බවයි.
මෙරට ගුරු විදුහල්පතිවරුන් දෙලක්ෂ හැටපන්දහසක් පමණ සිටින අතර එම විශාල සංඛ්‍යාතය අතරින් හොඳම ගුරුවරිය ලෙස හයේෂිකා ප්‍රනාන්දු ගුරුවරියව තෝරාගැනීම පිළිබඳව තමන් පුදුමයට පත් වුණූ බව අමාත්‍යවරයා එහිදී සඳහන් කළා.
එබැවින් තමන්ගේ හෘද සාක්ෂියට එකඟව එවැනි සම්මානයක් තමන් විසින් ඇයට දීමේ හැකියාවක් නොතිබුණූ බවයි අමාත්‍ය මහින්ද ජයසිංහ මහතා පවසන්නේ.
ඒ අනුව තමන් නිහතමානීව සම්මානය ලබාදීම ප්‍රතික්ෂේප කළ බව අමාත්‍යවරයා වැඩිදුරටත් පෙන්වාදෙනවා.
✅✅✅