හොරොව්පොතාන, කහටගස්දිගිලිය ප්‍රධාන මාර්ගයේ ඇලයාපත්තුව ප්‍රදේශයේදී අද (28) සවස සිදුවූ මාරක රිය අනතුරකින් පාසල් සිසුවියක් සහ රිය සහයකයෙකු ජීවිතක්ෂයට පත්ව ඇති බව හොරොව්පොතාන පොලිසිය කියයි.
මෙලෙස ජීවිතක්ෂයට පත්ව ඇත්තේ හොරොවිපොතාන,මොරකෑව පාසලේ ඉගෙනුම ලැබූ සදැසි විහංසා නැමති 10 හැවිරිදි දැරියක් සහ 27 හැවිරිදි රිය සහයෙකයෙකි.
එදින01.20ට පමණ හොරොව්පතාන පොලිස් වසමේ මොරකෑව ප්‍රදේශයේ ඇලපත්වැව හංදියට මීටර් 200 ක් පමණ කහටගස්දිගිලිය දෙසට වන්නට ඇති පාලම අසලදී මෙම අනතරු සිදුව ඇත. වවුනියා සිට අනුරාධපුර දෙසට වීදුරු ප්‍රවාහනය කරමින් සිටි ලොරි රථයේ රියදුරුට නින්ද යාම හේතුවෙන් එම ලොරි රථය මාර්ගයෙන් ඉවතට පැන ඇත. අනතුරුව ලොරි රථය අසල තිබූ පාලමෙහි ආරක්ෂිත වැටෙහි ගැටී අනතුරට පත්ව ඇත.
එම අනතුරෙන් පාසල් අවසන් වී නිවස බලා යමින් සිටි මොරකෑව විද්‍යාලයේ 05 ශ්‍රේණියේ ඉගෙනම ලබන රිටිගහවැව, මොරකෑව ලිපිනයේ පදිංචි සදැසි විහංසා නැමති අවුරුදු 10 ක් වයසැති සිසුවිය රෝහල් ගත කිරීමෙන් අනතුරුව මියගොස් ඇත. එහිදී ලොරි රථයේ තිදෙනෙකු ගමන් කර ඇති අතර ඉන් රිය සහායක ලෙස කටයුතු කල පුද්ගලයා එම ස්ථානයයේම මියගොස් ඇත. රියදුරු හා අනෙකුත් පුද්ගලයා බරපතල තුවාල ලබා හොරොව්පතාන රෝහලට ඇතුළත් කිරීමෙන් අනතුරුව වැඩිදුර ප්‍රතිකාර සඳහා අනුරාධපුර රෝහල වෙත රැගෙන ගියබව රෝහල් ප්‍රකාශකයෙකු අපකළ විමසීමේදී පැවැසීය.
මියගිය සිසුවියගේ හා රියදුරු සහායකගේ මෘත ශරීර හොරොව්පතාන රෝහලේ තැන්පත් කර ඇති අතර මියගිය රියදුරු සහායක හා අනෙකුත් පුද්ගලයන් දෙදෙනාගේ නම, ලිපිනය ඇතුළු තොරතුරු පොලිසියට අනාවරණය වී නොමැති බවත් එම තිදෙනාම දෙමළ ජාතිකයින් බවත් පොලීසිය කීහ.
හොරොව්පොතාන පොලිස් ස්ථානාධිපති ප්‍රධාන පොලිස් පරික්ෂක නවීන් ඉන්ද්‍රජිත් දයානන්ද මහතාගේ උපදෙස් පරිදි මෙම මාරක රිය අනතුර සම්බන්ධයෙන් හොරොව්පතාන පොලිස් ස්ථානයේ රථවාහන අංශයේ ස්ථානාධිපති උප පොලිස් පරික්ෂක ජයවර්ධන මහතා ඇතුලු නිලධාරීන් හා විශේෂ කාර්යාංශ නිලධාරීන් විසින් වැඩිදුර විමර්ශන සිදුකරයි.
සිඩ්නි රුවන් උබේපාල