දරුවන්ගේ දිවි ගැලවූ සීයා සිරිපාල
සෙනවිරත්න
අත් බෝම්බය
වැවට විසිකර තිබූ අත්බෝම්බයක් කුඩා දරුවන් තිදෙනෙකු අහුලා ගනිමින් එහි කෑලි ඉවත් කර කුමක්ද යන්න පරීක්ෂා කරමින් සිටියදී සීයා එය දැක දරුවන්ගේ දිවි ගලවාගත් පුවතක් මැදවච්චිය පොලිස් වසමේ අඟුනොචිචය, පළුකඳවැව ගම්මානයෙන් වාර්තා වෙයි. මෙලෙස අනතුරට පත් නොවී දිවි ගලවාගෙන ඇත්තේ පළුකඳවැව ගම්මානයේ පදිංචි අනුරාධපුර මැදි මහ විදුහලේ 6 ශ්රේණියේ ඉගෙනුම ලබන 11 හැවිරිදි සශේන් අභිසේත් රත්නායක, බාල සොහොයුරා වූ ශෙනෝත් අභිලාස් රත්නායක නමැති වයස අවුරුදු දෙකහමාරක කුඩා දරුවා සහ අනුරාධපුර නිවත්තකචේතිය විදුහලේ අධ්යාපනය ලබන 16 හැවිරිදි 12 වැනි ශ්රේණියේ ඉගෙනුම ලබන දැහැමි ජනන්දනා රූපසිංහ නමැති දරුවන් තිදෙනාය. පසුගියදා (05) සවස මැදවච්චිය ප්රාදේශීය ලේකම් බල ප්රදේශයේ තුලාන අංක 70 අඟුනොචිචයේ පිහිටි පළුකඳවැව ගම්මානයේ වැවට යාබදව ඇති වෙල්යාය කිසියම් පිරිසක් විසින් ගිනි තබා ඇත. එම ගිනි ගැනීම හේතුවෙන් පිඹුරකු පිලිස්සී සිටිනු දැක ගම්වාසීන් එය බැලීමට වැවට ආසන්නව පිහිටි වෙල්යායට ගොස් ඇත. මේ දරුවන් තිදෙනාද ඒ ස්ථානයට තම සීයා සමඟ ඒ මොහොතේ ගොස් ඇති අතර එහි සිටි වයස අවුරුදු දෙකහමාරක් වයසැති කුඩා පිරිමි දරුවා වැව දෙසට දිවගොස් ඇත. මල්ලිව රැගෙන ඒමට වැව දෙසට දිවගිය 11 හැවිරිදි සශේන් අභිසේත් රත්නායක නමැති වැඩිමහල් දරුවා ද පැමිණීමට ප්රමාද වීම හේතුවෙන් දෙදෙනාම රැගෙන ඒමට 16 හැවිරිදි දැහැමි ජනන්දනා රූපසිංහ නමැති ඥාති දියණිය ගොස් ඇත. අනතුරුව තිදෙනාම ප්රමාද වීමත් සමඟ සීයා ඒ දෙසට ගොස් ඇති අතර ඒ වන විට දරුවන් මේ අත් බෝම්බය රැගෙන සෙල්ලම් කරමින් සිටිනු දැක ඇත. සීයා එය දුටු විගස කෑ ගසා දරුවන්ට එය වීසි කරන ලෙස දන්වා ඇති අතර ඒ මොහොතේ දරුවන් එය ඉවත දමා ඇත. අනතුරුව අත්බෝම්බය හමු වූ ස්ථානය පිළිබඳව දරුවන්ගෙන් විමසා බැලීමේදී වැව් ඉවුරට ආසන්නව ජලයේ ගෑවී නොගෑවී තිබෙන අයුරින් මේ ජීව අත් බෝම්බය තිබූ බවත් එය බෝම්බයක් බව නොදන්නා දරුවන්ගෙන් වැඩිමහල් පිරිමි දරුවා වූ 11 හැවිරිදි සශේන් අභිසේත් රත්නායක නමැති දරුවා අතට ගෙන පරීක්ෂා කර බලා ඇති බවත් පවසා ඇත. ඔවුන් එය වතුර මෝටරයකට සවි කරන ෆුට් වෑල් එකක්යැයි සිතා ගලක ගසා ආවරණය ඉවත් කර එහි තිබූ පින් එක ඇද ඇති අතර එම පින් එක ඉවත් කරගැනීමට පෙර මේ දරුවන්ගේ සීයා වූ සිරිපාල සෙනෙවිරත්න මහතා දුටු බව ද දරුවන් පවසා ඇත. අනතුරුව සීයා දරුවන් තිදෙනාම ආරක්ෂිත ස්ථානයකට ගෙන ගොස් ඇත.
සීයා ගම්වාසීන් දැනුම්වත් කර මැදවච්චිය පොලිස් ස්ථානාධිපති ඒ.ඒ.කේ.එස්. අධිකාරි මහතාට දන්වා ඇත. ඒ මොහොතේම ස්ථානාධිපතිවරයා ප්රමුඛ පොලිස් කණ්ඩායමක් පැමිණ මේ අත්බෝම්බය සිය භාරයට ගෙන ඇත. මූලික පරීක්ෂණවලදී අත්බෝම්බය මීට දින කීපයකට පෙර විසි කර ඇති බව අනාවරණය වූ බවත් දරුවන් අතේ මේ අගාස් වර්ගයේ අත් බෝම්බය පිපිරීමේ සම්භාවිතාවට වැඩි ඉඩකඩක් තිබුණු බවත් අප කළ විමසීමේදී පොලීසිය ප්රකාශ කළේය.
වැඩිදුර පරීක්ෂණ මැදවච්චිය පොලීසිය සිදු කරයි.
ඡායාරූප – කැබිතිගොල්ලෑව සමූහ – එස්.ජී. උබේපාල
✅✅✅✅✅✅✅✅✅